Ang maikling kwento na pinamagatang bunga ng kasalanan ay tungkol sa mag- asawa na sina Rodin at Virginia. Si Virginia ang babaing madasalin, palasimba, ay may sampung taon nang kasal kay Rodin. At sa sampung taon nilang pagsasama ay hindi pa sila binibiyayaan ng anak. Mayaman si Virginia, may pangalan si Rodin at silang dalawa ay nabubuhay sa kasaganaan.. Dahil sa pangungulilang gustong magkaroon ng anak sila'y palaging nagdadasal sa Mahal na Birhen, at taimtim na tumatawag sa Diyos at ganun din sa kamahal mahalang San Pascual at Santa Klara. Sa halip na patuloy na manalig, sila'y nawalan ng pag asa at sa Doktor humingi ng tulong. Matapos ang matiyagang pagpapagamot di naglaon at sila'y nagkaroon ng anak.
Si Virginia palibhasa'y madasalin, at may takot sa Diyos siya'y nag-aalinlangan sa kalinisan ng kanyang pagiging ina. Napag isip isip niyang ang kanilang anak ay hindi laman ng kanilang laman, kundi bula ng mga gamot na pinaghalo-halo ng karunungan, at nilimot niyang siya ay isang ina. Dahil sa pag iisip niya, minsan isang araw ng makita niyang iniiwi ni Rodin ang kanilang anak ay pinag-apuyan niya ito ng mata at pasisid na inagaw ang bata sa bisig ni Rodin. Isinigaw ni Virginia, "itong batang ito ay bunga ng kasalanan, ito'y hindi natin anak" at dahil dito siya'y nabaliw.
Habang pinasisikatan ng araw ni Rodin ang kanilang anak makikita sa kanyang mga mata na siya'y malungkot, dahil sa ikinikilos ng kanyang asawa . Dahil sa sobrang pag iisip at pagsisisi ni Virginia siya'y nanaginip na ang kanyang anak ay pinagmamalupitan ni Rodin na animo'y isang halimaw. Napasigaw si Virginia agad niyang pinuntahan ang kanyang anak at nakita niyang ito'y nakangiti at naglalaro sa bisig ni Rodin. At dahil sa ngiting yaon ng kanilang anak, ay nagliwanag na ang pag iisip ni Virginia. Isinigaw niya ng may buong pag giliw at kaligayahan na "ang batang ito ay aking anak."
No comments:
Post a Comment